قيادي بامي: التعددية قوة والنموذج المغربي يعتمد على القيم الدينية وأيضا العقلانية 

شوف تيفي

أفاد القيادي البامي وعضو المكتب السياسي بالبام هشام عيروض، أن النقاش على العلمانية في المغرب ” يدفعنا نهضرو على النموذج المغربي اللي كيعكس الخصوصية ديالنا كمغاربة، نموذج مستلهم من المرجعية الدينية اللي كتمثلها إمارة المؤمنين، وفنفس الوقت منفتح على القيم الكونية ديال العصر”.

وأضاف عيروض”  المغرب عندو تراكم كبير فهذ المجال، وعلاقة المغاربة مع الدين ديالهم هي علاقة خاصة بداوها الأمازيغ ملي اعتنقو الإسلام، وقدرو يكونو مسلمين ويحترمو خصوصيات المجتمع المغربي اللي كان عندو قيم وأخلاق وأساليب للعيش المشترك حتى قبل ما يبان الإسلام”.

وشدد عيروض على أن المغاربة ” ماشي ضد الدين، بالعكس، طورو أسلوبهم الخاص فالتعلم اللي خلاهم من أكثر الناس اللي حافظين القرآن فالعالم، وبناو أكبر عدد ديال المساجد، ولكن فنفس الوقت ثقافتنا المغربية مختلفة كتمتد جذورها لآلاف السنين، وأن العلمانية فالسياق المغربي ماشي شي حاجة كنجيبوها من برا ونديروها بحذافيرها، ولكن خاصها تكون إطار متكامل كيتبنى على الدين كمرجع أخلاقي وكحامي للقيم المشتركة”.

وتابع عيروض تعليقه على نقاش العلمانية بالقول: ” التعددية ماشي خطر على الوحدة، بالعكس، هي قوة، خاصنا نضمنو الانفتاح على جميع الأفكار وكلشي يكون داخل إطار مشروع مجتمعي كيركز على المواطنة واحترام القانون، وهادشي هو اللي غادي يزيد فالتضامن والتماسك بين الناس، حيث حتى إلا كنا مختلفين، الهدف ديالنا كامل هو الصالح العام، وباش نبنيو نموذج مغربي حديث، خاصنا نعتمدو على قيمنا الدينية باش نعززو الأخلاق ونحاربو الفساد، وفنفس الوقت نخَدمو العقلانية باش نطورو المؤسسات ديالنا ونضمنو الشفافية والحكامة”.

وأكد المصدر ذاته أن: ” المغرب عندو فرصة ما تتعوضش باش يكون نموذج فريد اللي كيجمع بين الهوية والقيم الكونية، نموذج كيعزز التعايش، يرسخ الديمقراطية، ويبني نهضة فكرية وسياسية كتجاوب مع طموحات المغاربة كاملين”.